வேதத்தில் இல்லாததை போதிக்கலாமா?

ஒரு கத்தோலிக்க பாதிரியார் தன் சபையிலிருந்த மக்களிடம், “உங்களைப் போன்ற அதிகம் படிக்காதவர்களால் வேதப்புத்தகத்தைப் புரிந்து கொள்ளவே முடியாது” எனக் கூறியிருந்தார். ஆனால் அங்குள்ள ஒரு சகோதரனுக்கு தற்செயலாய் ஒரு புதிய ஏற்பாடு கிடைத்தபடியால் அதை வாசிக்கத் தொடங்கினார். சீக்கிரத்தில் இரட்சிக்கவும்பட்டார். ஒருநாள் அவர் தன் வீட்டில் புதிய ஏற்பாட்டை வாசித்துக்கொண்டிருந்தபோது பாதிரியார் வந்துவிட்டார். “வேதப்புத்தகத்தை நீ படிக்கலாகாது; இது கற்றுத்தேர்ந்த அறிஞர்களுக்கு மாத்திரமேயாகும்” என கடுமையாக எதிர்த்தார்.

அச்சகோதரன், “ஐயா இதை வாசித்ததின் விளைவாக நான் இரட்சிக்கப்பட்டுவிட்டேன்; அதுமாத்திரமல்ல நான் கிறிஸ்துவுக்குள் வளர திருவசனமாகிய களங்கமில்லாத ஞானப்பாலின் மேல் நான் வாஞ்சையாய் இருக்கவேண்டும் எனவும் (1பேதுரு 2:3) வசனம் எனக்கு கூறுகிறது” என்றார். ஞானப்பால் என்ற வார்த்தையைக் கேட்டதும் பாதிரியார், “சரிதான் ஆகிலும் பாதிரியாராகிய எங்களைத் தான் பால் கறந்து தரும்படி வைத்திருக்கிறார்” என்று பெருமிதத்தோடு கூறினார். அச்சகோதரன் சற்றும் தயங்காமல், “எனக்குக் கூட தினமும் பால் கொண்டுவரும் பால்காரன் இருந்தான். ஆனால் அவன், பாலில் தண்ணீர் கலப்பதை நான் சீக்கிரத்தில் கண்டுபிடித்தேன். ஆகவே பால்காரனுக்கு பதிலாக ஒரு பசுவை வாங்கிவிட தீர்மானித்தேன். ஐயா, இப்போது எனக்கு சுத்தமான பால் கிடைக்கிறது.” என தைரியத்துடன் பதிலளித்தார். அந்த பாதிரியாருக்கோ திகைப்புடன் கூடிய வெட்கம் சூழ்ந்துகொண்டது.

அன்பான சகோதர-சகோதரிகளே, பாவம் நிறைந்த இந்த இருளான உலகத்தில் நாம் முன்னேறி நடந்து செல்ல நமக்கு கிடைத்திருக்கும் ஒரே வெளிச்சம் வேதவசனம் மாத்திரமே! நாமாக வேதவசனத்தை ஆராய்ந்து ஆர்வமுடன் கற்றால் மட்டுமே கலப்படமற்ற உபதேசமாகிய சுத்தமான பாலை நாம் பெற்றிட முடியும். நம் வாழ்வின் எந்த பிரச்சனைக்கும் வேதவசனத்திலிருந்தே பதிலைப் பெறமுடியும். அதற்கு தேவனுடைய வசனத்தை தியானிப்பதற்கென கிரமமாய் நேரத்தை செலவு செய்ய வேண்டும். 

ஆனால் இன்றைய நிலையோ 
வேத வாசிப்பு இல்லாமையால், நமக்கு போதிக்கபடுவதில் எது உண்மை? எது பொய்? என்பதை அறிந்துகொள்ள முடியாமல் எல்லாவற்றையும் நம்புகின்றனர். 

ஆனால் பெரோயா பட்டணத்து விசுவாசிகள் பவுல் பிரசங்கத்தைக் கூட அவைகள் வேதவாக்கியங்களில் இருக்கிறதா என ஆராய்ந்து பார்த்தபிறகே ஏற்றுக்கொண்டார்கள். 

இப்படிப்பட்ட ஒரு அறிவு நமக்கு இருக்குமென்றால் பிசாசானவனின் வஞ்சகத்தில் நாம் எளிதில் வீழ்ந்துவிட முடியாது.

விழித்துகொள் சகோதரனே விழித்துகொள்