தேவனின் மகிமையைக் கூறும் – எசேக்கியேல்

☀ மூல மொழியாகிய எபிரேயத்தில் யெச்சேஸ்குவேல் (Yehezqel) என்னும் பெயர் கொண்டுள்ளது. ☀ கிரேக்கத்தில் Iezekiel என்றும், இலத்தீனில் Ezechiel என்றும் இந்நூல் பெயர்கொண்டுள்ளது. ☀ எசேக்கியேல் என்பதற்கு "தேவன் பெலப்படுகிறார்" என்று அர்த்தம். ☀ நம்முடைய பரிசுத்த வேதாகமத்திலே 26-வது புத்தகமாக வருகிறது. ☀ இப்புத்தகத்தின் தீர்க்கதரிசனங்கள் எல்லாம் எசேக்கியேலால் உரைக்கப்பட்டதாகவே இப்புத்தகம் வெளிப்படுத்துகிறது. (1:3, 24:24). 

☀ இப்புத்தகமெங்கும் உபயோகப்படுத்தப்பட்டிருக்கும் “நான்” என்ற வார்த்தையும், எழுத்து நடையும் எசேக்கியேல் மாத்திரமே இப்புத்தகத்தை எழுதியிருக்க முடியும் என்பதை நமக்குக் காட்டுகிறது. ☀ தீர்க்கதரிசனங்கள் ஒரு ஒழுங்கான தேதி முறையில் எழுதப்பட்டிருப்பதால் அவனது தீர்க்கதரிசனங்களைக் காலம் குறிப்பிட வசதியாகவுள்ளது. கி.மு. 593 ஜூலையில் தொடக்கப்பட்ட எசேக்கியேலின் ஊழியம் கி.மு. 571 ஏப்ரல் மாதத்தில் பதிவு செய்யப்பட்ட கடைசி தீர்க்கதரிசனம் வரை தொடர்ந்து உரைக்கப்பட்டிருக்க வேண்டும். 

☀ எசேக்கியேல் ஒரு ஆசாரிய வகுப்பைச் சார்ந்தவர். இவர் சாதோக் வகுப்பைச் சார்ந்த பூசி என்பவனுடைய மகன். ☀ தனது 30 வது வயதில் ஆசாரிய ஊழியத்தைப் பெற பயிற்சி பெற்றவர். முடிவில் தீர்க்கதரிசியாக நியமிக்கப்படுகின்றார். இதேப் போல் எரேமியா, சகரியா போன்றவர்களும் ஆசாரிய வகுப்பைச் சார்ந்தவர்களாயிருந்தும் தீர்க்கதரிசியாக தேவனால் நியமிக்கப்பட்டவர்கள். ☀ கி.மு.598 மூன்றாம் நாடு கடத்தலில் எசேக்கியேல் பாபிலோனுக்கு சிறைக்கைதியாகக் கொண்டு போகப்பட்டிருக்கலாம்.

 ☀ முதல் சிறையிருப்பில் போன தானியேலும், எசேக்கியேலும் ஏறத்தாழ சமவயது அதாவது 17 வயதை உடையவராக இருந்திருக்கலாம். ☀ எசேக்கியேல் தனது 25 வயதில் பாபிலோனுக்குக் கொண்டு போகப்பட்டு, 30 வயதில் ஊழியத்தைப் பெற்றார். கி.மு. 593-570 வரை ஏறத்தாழ 22 ஆண்டுகள் இவர் தனது ஊழியத்தை செய்தார். கி.மு. 586-யில் எருசலேமின் அழிவுக்கு முன் 7 ஆண்டுகளும், பின்னர் 15 ஆண்டுகளும் இவர் ஊழியம் செய்தார். ☀ நேபுகாத்நேச்சார் எருசலேம் மீது கடைசி முற்றுகையை தொடங்கின நாளிலேயே அவருடைய மனைவி மரித்துவிட்டாள். (24:2,18) ☀ எசேக்கியேலின் 7 வருட ஊழியத்தின் தீர்க்க தரிசனங்கள் (1-32 அதி.) எசேக்கியேலின் 15 வருட ஊழியத்தின் தீர்க்க தரிசனங்கள் (33-48 அதி.) 

☀ இந்தப் புத்தகம் இயல்பாகவே மூன்று பகுதிகளாக பிரிகிறது. 1). 1 - 24 அதிகாரங்கள் அடங்கிய முதல் பகுதியில் எருசலேமிற்கு அழிவு நிச்சயம் என்ற எச்சரிக்கைகள் அடங்கியுள்ளன. 2). 25 - 32 அதிகாரங்கள் அடங்கிய இரண்டாவது பகுதியில் பல புறமத தேசங்களுக்கு எதிரான தண்டனைத் தீர்ப்புக்குரிய தீர்க்கதரிசனங்கள் உள்ளன. 3). 33 - 48 அதிகாரங்கள் உள்ள கடைசி பகுதியில் திரும்ப நிலை நாட்டப்படுவது பற்றிய தீர்க்கதரிசனங்கள் அடங்கியுள்ளன; ஒரு புதிய ஆலயத்தையும் பரிசுத்த நகரத்தையும் பற்றிய தீர்க்கதரிசனத்தோடு அந்தப் பகுதி முடிவடைகிறது. ☀ இந்தத் தீர்க்கதரிசனங்கள் பெரும்பாலும் காலவரிசைப்படியும் பொருளுக்கேற்பவும் அமைக்கப்பட்டுள்ளன.

 ☀ மொத்தம் 48 அதிகாரங்களும், 1273 வசனங்களையும் கொண்டுள்ளது. ☀ 16-வது அதிகாரம் பெரிய அதிகாரமாகவும், 15-வது அதிகாரம் சிரிய அதிகாரமாகவும் உள்ளது. ☀ இரண்டு வேறுபடுத்திக் காண்பிக்கும் மென்மையான சொற்றொடர்கள் புத்தகத்தில் பயன்படுத்தப்பட்டுள்ளன. “நான் கர்த்தர் என்று அறிந்து கொள்வார்கள்” இது 65 இடத்திலும் “தேவ மகிமை” என்று வார்த்தை 19 இடத்திலும் வருகிறது. ☀ மனுபுத்திரன், காவல்காரன், ஜாமக்காரன் போன்ற வார்த்தைகள் தீர்க்கதரிசிக்கு தேவனால் பயன்படுத்தப்பட்டுள்ளது.

 ☀ இது யூதாவின் மீட்பின் சம்பவம் (உலர்ந்த எலும்பு உயிரடைதல்) மிக அழகாக கூறப்பட்டுள்ளது மட்டுமல்ல ஆலயத்திலிருந்து புறப்படும் ஆறு தரிசனம் சிறந்தவை. ☀ ஒரு மனிதன் தேவனை தரிசிப்பதை இந்நூல் தெளிவாக விளக்குகிறது. ஆவியின் நிறைவு மற்றும் ஆவியில் எடுத்துச் செல்லப்படுதல் போன்ற அனுபவங்கள் அற்புதமாக விளக்கப்பட்டுள்ளன. 

☀ அநேக கள்ள மேய்ப்பர்கள் பற்றியும், நல்ல மேய்ப்பனாகிய கிறிஸ்துவைப் பற்றியும் கூறப்பட்ட பகுதி (34 அதிகாரம்) கள்ள மேய்ப்பர்கள், நல்மேய்ப்பராகிய கிறிஸ்து அ. அவர்கள் மந்தைகளைப் போஷிப்பதற்கு பதிலாக தங்களையே போஷித்தார்கள் (34:2,3) இஸ்ரவேல் மலைகளில் அவர்களைப் போஷிப்பார் (34:14) ஆ. அவர்கள் நசல் கொண்டதை குணப்படுத்தாமலும், எலும்பு முறிந்தவைகளை காயம் கட்டாமலும், காணாமல் போனதைத் தேடாமலும் இருந்தார்கள் (34:5) அவர் காணாமல் போன ஆடுகளைத் தேடுவார். அவர் எலும்பு முறிந்ததைக் காயம் கட்டி குணப்படுத்துவார் (34:11,16) இ. அவர்கள் மேய்ப்பன் ஸ்தானத்திலிருந்து தள்ளுண்டு போவார்கள் (34:10) அவர்களுடன் நித்திய உடன்படிக்கை செய்வார் (34:25) 

☀ தேவாலயத்தின் இரண்டு தரிசனங்கள் இதில் பதிவு செய்யப்பட்டுள்ளது. அ) சீர்க்கேடடைந்து அழிவுக்குக் காத்திருக்கும் தேவாலயம் (8-11 அதி.) ஆ) பரிசுத்தமாக்கப்பட்டு, பரிபூரணமாய்ப் புதுப்பிக்கப்பட்ட தேவாலயம் (40-48 அதி.) ☀ மற்ற தீர்க்கதரிசிகளைக் காட்டிலும் அதிகமான கிரியைகளை தன் வாழ்க்கையிலேயே காண்பிக்கும் புத்தகம். ☀ ஆயிர வருட அரசாட்சியின் தேவாலயத்தையும், எருசலேமையும் மகிமையோடு கூறும் புத்தகம். புதிய வானம், புதிய பூமியை படம் பிடித்துக் காட்டும் ஏசாயாவைப் போல் ஆயிர வருட அரசாட்சியின் தேவாலயம், ஆசாரியன் நிலை, எருசலேமின் நிலை போன்றவற்றை கிரமமாக அறிந்து கொள்ள முடிகிறது.