நாங்கள் செய்த பாவம் தான் என்ன ?

வீட்டு மனை தயாராகிக் கொண்டிருந்த அந்த
நிலத்தின் ஓரம் நின்றிருந்த 
பனை மரங்களின் ஓலைகளில் 
தொட்டு தடவி வந்த காற்று கேட்டது - 
நாங்கள் செய்த பாவம் தான் என்ன ? 

அந்த மரத்தின் கிளைகளில் 
கூடு கட்டி குடும்பத்துடன்
வசித்து வந்த தூக்கணா குருவிகள் கேட்டது -
இனிமேல் நாங்கள் எங்கு தான் சென்று வாழ்வது ? 

அந்த மரங்களையே சுற்றி சுற்றி 
விளையாடி வந்த அந்த சிறுவர்களின் 
வாடிய முகங்கள் சோகத்துடன் கேட்டது -
இனிமேல் நாங்கள் எங்கு தான் விளையாடுவது ?

அந்த மரங்களின் நிழலையே 
மதிய வெயில் ஆற்ற பயன்படுத்திய 
அந்த இடத்தில் கட்டப்பட்ட மாடுகள் ஏக்கத்துடன் கேட்டது -
இனிமேல் நாங்கள் எங்கே தான் ஒதுங்குவது ?

இதில் எந்த ஒரு கேள்விக்கும் 
பதில் தரமுடியாமல் நடந்து வந்து கொண்டிருந்த 
என் கண்களில் பட்டது அந்த பச்சை நிற பலகை 
" கிரீன் சிட்டி " 
உங்களை அன்புடன் வரவேற்கிறது !