வெள்ளத்தில் மூழ்கிய கார், பைக்குகளுக்கு இன்ஷூரன்ஸ் கிடைக்குமா?

தமிழ்நாட்டில் தொடர்ந்து கடந்த பல நாட்களாக மழை பெய்து வருகிறது. சென்னை நகரம் தண்ணீரில் தத்தளிக்கிறது. இந்த மழையினால் கார், பைக் நீரில் மூழ்கி பாதிப்படைந்துள்ளன. சில இடங்களில் கார்களும், பைக்குகளும் வெள்ளத்தில் அடித்துச் செல்லப்பட்டு குப்பை போலவும் காட்சி அளித்தன.

இந்த நிலையில் வெள்ளத்தில் சிக்கிய கார், பைக் மற்றும்  வீடுகளுக்கு இழப்பீடு கோர முடியுமா? இன்ஷூரன்ஸ் நிறுவனங்களை எப்படி அணுகுவது? என்பதே பெரும்பாலனவர்களின் கேள்வியாக உள்ளது.

இது குறித்து இன்ஷூரன்ஸ் துறை நிபுணர் திருமலை என்பவரிடம் கேட்டோம். அவர் கூறுகையில், ''இன்ஷூரன்ஸ் செய்யப்பட்ட எந்த ஒரு பொருளாக இருந்தாலும் அதை பத்திரமாக பாதுகாப்பது நம்முடைய கடமை. இன்ஷூரன்ஸ் செய்யப்பட்டுள்ளது என்ற காரணத்தினால் வாகனத்தை ரேஸில் ஈடுபட்டு பாதிப்பிற்கு உள்ளானால் அதற்கு க்ளெய்ம் கிடையாது. ஏனெனில் நியாயமான பாதுகாப்பை அந்த நபர் எடுத்துக் கொள்ளவில்லை. அதனால் அதற்கு க்ளெய்ம் கிடைக்காது.



போட்டோ எடுங்க

கார், பைக் போன்ற வாகனங்கள் மழை நீர், வெள்ள நீரில் சிக்கி பாதிப்புக்கு உள்ளானால் முதலில் இன்ஷூரன்ஸ் நிறுவனங்களுக்கு தெரியப்படுத்த வேண்டும். பாதிக்கப்பட்ட கார் அல்லது பைக் என எதுவாக இருந்தாலும் அதை ஒரு போட்டோ எடுத்து இன்ஷூரன்ஸ் நிறுவனத்தின் இமெயில் முகவரிக்கு அனுப்ப வெண்டும்.
இமெயிலில் "என்னுடைய வாகனம் XXX இந்த பாலிசியில் கவராகியுள்ளது. இப்பொழுது மழைநீரில் மூழ்கி பழுதடைந்து நிற்கிறது. ஸ்பாட் சர்வே செய்து இன்ஷூரன்ஸ் க்ளெய்ம் வழங்க ஆவண செய்யுமாறு கேட்டுக்கொள்கிறேன்" இந்த இரண்டு வரிகளிலேயே இன்சூரன்ஸ் க்ளெய்ம் பெறுவதற்கான நடவடிக்கை தொடங்குகிறது.

க்ளெய்ம் கிடையாது

ஆனால், சில இன்ஷூரன்ஸ் நிறுவனங்கள், வெள்ளம் அல்லது மழை நீரில் பாதிப்படைந்த காரை இயக்கி, அதனால் இன்ஜின் சேதமடைந்தால் க்ளெய்ம் தரமாட்டார்கள். இதை தங்களது விதிகளில் குறிப்பிட்டுருப்பார்கள். ஆகையால் கவனமாக இருப்பது அவசியம்.

ஏனெனில் மழை, வெள்ளத்தினால் பாதிக்கப்பட்ட காரை இயக்கினால் அது திட்டமிட்ட செயல். மழைநீர் சேர்ந்ததோடு பாதிக்கப்பட்டவர்கள் தங்களது காரை ஒரு போட்டோ எடுத்து இன்ஷூரன்ஸ் நிறுவனங்களுக்கு தெரியப்படுத்திவிட்டால் அவர்களால் க்ளெய்ம் மறுக்க முடியாது.

முதல் மூலக்காரணம்

இன்ஷூரன்ஸ் நிறுவனங்கள் வழங்கும் க்ளெய்ம் பொறுத்தவரை அவர்களுக்கு முதல் மூலக்காரணம் எதிர்பாராத செயலாக இருக்க வேண்டும். ஆனால், பாதிக்கப்பட்டவர் வாகனத்தை இயக்க செய்தால் அது திட்டமிட்ட செயலாக மாறிவிடுகிறது. எனவே, வாகனம் எந்த நிலைமையில் இருக்கிறதோ அதை நிலைமையில் ஒரு போட்டோ எடுத்து வாட்ஸ்அப் மூலமாகவோ அல்லது அவர்களுடைய இமெயில் முகவரிக்கு தெரியப்படுத்துவதே நல்லது.

இப்போது சென்னையில் கார், பைக் மழை நீரினால் பாதிக்கப்பட்டு உள்ளது. எனவே, மழை நீரினால் பாதிப்படைந்துள்ளது என்ற காரணத்தினால் க்ளெய்ம் வழங்குவார்கள்.

இமெயில் அனுப்புங்க

ஒவ்வொரு இன்சூரன்ஸ் பாலிசியிலும் அந்த இன்சூரன்ஸ் நிறுவனங்களை தொடர்பு கொள்ளக்கூடிய போன் நம்பர் இருக்கும் அல்லது அந்த நிறுவனத்தின் பொதுவான இமெயில் ஐடி-க்கு தெரியப்படுத்த வேண்டும்.

வீடு பழுதடைந்து இருந்தாலும் அதையும் ஒரு போட்டோ எடுத்து இன்சூரன்ஸ் நிறுவனங்களுக்கு தெரியப்படுத்துங்கள். இன்சூரன்ஸ் நிறுவனங்களுக்கு இழப்பீடுகளைக்கோர எழுதிதான் தர வேண்டும் என எந்த ஒரு அவசியமுமில்லை. இப்பொழுது உள்ள வசதிக்கு இன்சூரன்ஸ் நிறுவனத்தின் செல்போன் நம்பருக்கே வாட்ஸ்அப் மூலமாக பாதிக்கப்பட்ட வாகனத்தை போட்டோ எடுத்து தெரியப்படுத்தலாம். இப்போது சென்னை நகரமே மிகப்பெரிய சோகத்தில் இருக்கும்போது இன்ஷூரன்ஸ் நிறுவனங்களுக்கு தெரியப்படுத்தினால் மட்டுமே போதும்.

வெளியே பாதிப்படைந்தால்?

வீட்டுக்கு வெளியே நிறுத்தப்பட்ட வாகனங்கள் வெள்ளத்தால் பாதிக்கப்பட்டாலும், நிறுத்தி வைக்கப்பட்டிருந்த வாகனங்கள் மீது மரங்கள், மின் கம்பங்கள் விழுந்து சேதம் ஏற்பட்டாலும் க்ளெய்ம் கிடைக்கும்.

வாகனம் வீட்டில் பாதிப்படைந்து இருந்தால் மட்டுமே க்ளெய்ம், வேறு ஒரு இடத்தில் பாதிப்படைந்து இருந்தால் க்ளெய்ம் கிடையாது அப்படி எதுவும் இல்லை. வாகனம் பாதிப்படைந்ததற்கு மூலக்காரணம் எது என்று ஆராய்ந்து இன்ஷூரன்ஸ் நிறுவனங்கள் க்ளெய்ம் வழங்குவார்கள்.



ஸ்பாட் போட்டோ

ஒருமுறை இன்ஷூரன்ஸ் நிறுவனங்களுக்கு தெரியப்படுத்திய பின்னர் பாதிக்கப்பட்டவர்களைத் தொடர்பு கொண்டு, உங்கள் வாகனம் எங்கு உள்ளதோ அந்த இடத்திற்கே வந்து சர்வேயர் பார்வையிடுவார். பாலிசிதாரரின் கடமை தெரியப்படுத்துவது மட்டுமே. இன்ஷூரன்ஸ் நிறுவனங்கள் ஆராய்ந்து பாதிப்படைந்தவர்களுக்கு க்ளெய்ம் வழங்குவார்கள்.

வாகன விபத்தில் 'ஸ்பாட் போட்டோ' எடுப்பார்கள். அதேபோல் மழைநீரில் பாதிக்கப்பட்ட வாகனத்தை ஒரு ஸ்பாட் போட்டோ எடுத்து வைப்பது நல்லது. ஏனெனில் இன்ஷூரன்ஸ் நிறுவனங்கள் க்ளெய்ம் வழங்க மறுக்க முடியாது. 

டோயிங் சார்ஜ்

இப்படி வழங்கப்படும் க்ளெய்ம் மழை வெள்ளத்தில் வாகனத்தின் பாதிப்பு மற்றும் தேய்மானத்தைப் பொறுத்து வழங்கப்படும். இன்ஷூரன்ஸ் க்ளெய்ம்-ல் டோயிங் சார்ஜ்-ம் கிடைக்கும். அதாவது இன்ஷூரன்ஸ் நிறுவனத்தின் சர்வேயர் பாதிப்படைந்த வாகனத்தைப் பார்த்து அதை எடுத்து செல்வதற்கான செலவும் இன்ஷூரன்ஸ்-ல் கிடைக்கும்.

பாலிசிதாரரின் கடமை

சென்னையில் சில இடங்களில் வெள்ளம் வடிய இன்னும் இரண்டு அல்லது மூன்று நாட்கள் ஆகும். ஆனாலும், பாதிப்பு இருக்கும்போதே பாதிக்கப்பட்ட கார், பைக் அல்லது வீட்டின் நிலைமையை ஒரு போட்டோவாக எடுத்து வைத்திருங்கள்.

தண்ணீரில் மூழ்கி இருக்கும் வாகனத்தை, தண்ணீர் வடிந்தவுடன் பாதிக்கப்பட்டவர்கள் அதை ஸ்டார்ட் செய்தால் க்ளெய்ம் கிடைக்காது. ஆகையால் வாகனத்தை இயக்காமல் இருப்பதே நல்லது. க்ளெய்ம்-க்கு அடிப்படையே எதிர்பாரத செயலாக இருக்க வேண்டும். ஆனால், வாகனத்தை இயக்க ஆரம்பித்தாலே க்ளெய்ம் கிடைக்காது.

உடனே அணுகுங்க

க்ளெய்ம் பெற பாதிக்கப்பட்டவர்கள் 24 மணி நேரத்திற்குள் இன்ஷூரன்ஸ் நிறுவனங்களை அணுக வேண்டும் என்று தெரிவித்து இருப்பார்கள். ஆனால், இப்பொழுது உள்ள சூழ்நிலையில் வெளியே செல்ல முடியாது. கடிதம் எழுத முடியாது. நேரடியாக இன்ஷுரன்ஸ் நிறுவனத்தின் அலுவலகத்திற்கும் போக முடியாது. ஆகையால், இமெயில் அனுப்பினாலே போதும். இன்ஷூரன்ஸ் க்ளெய்ம் வழங்குவதற்கு உதவிக்கரமாக ஒரு போட்டோ இருந்தாலே போதும். வேறு எந்த ஒரு ஆவணங்களும் தேவையில்லை.

இன்சூரன்ஸ் நிறுவனங்களிடம் க்ளெய்ம் கோரும் போது காலம் கடத்தக் கூடாது. உடனடியாக இன்சூரன்ஸ் க்ளெய்ம் கோர வேண்டும். அதேசமயம் இன்ஷூரன்ஸ் நிறுவனங்கள் க்ளெய்ம் வழங்க இழுத்தடித்தாலோ அல்லது மறுத்தாலோ அதற்கும் வழிகள் உண்டு. ஆகையால் இதுகுறித்து கவலைகொள்ளத் தேவையில்லை. இன்ஷூரன்ஸ் நிறுவனங்களும் இதுபோன்ற சூழ்நிலைகளில் மனிதநேயத்துடன் க்ளெய்ம்-களை அணுக வேண்டும்'' என்று திருமலை தெரிவித்துள்ளார்.