நாக்கு மென்மையானதா, கடினமானதா?

முதலாளி ஒருவர் தன் பணியாளரின் அறிவை சோதிக்க விரும்பினார். எனவே அவரிடம் , அன்று மதியத்திற்கு உலகிலேயே மென்மையான இறைச்சியை சமைத்து வைக்கும்படி கட்டளையிட்டார். பணியாளரும் அவர் சொன்னபடியே சந்தையிலிருந்து நாக்கு இறைச்சியை வாங்கி வந்து சமைத்து வைத்தார். முதலாளி சாப்பிடும் முன்னர் கேட்டார் , " இது என்ன இறைச்சி? இதுதான் உலகிலேயே மென்மையான இறைச்சியா?" . பணியாளரும்,

" ஐயா! இது நாக்கு. இதில் கொஞ்சம் கூட எலும்பே கிடையாது. முழுதுமாக சதை மட்டுமே உள்ளது. எனவே இதுதான் உலகிலே மிக மென்மையான இறைச்சி " என்றார். முதலாளி அமைதியாய் புன்னகைத்தபடியே சாப்பிட்டுவிட்டு சென்றார். மறுநாள் முதலாளி சொன்னார், 

" நேற்று உலகிலேயே மிகவும் மென்மையான இறைச்சியை சமைத்துக் கொடுத்தாயல்லவா? இன்று உலகிலேயே மிகவும் கடினமான இறைச்சியை சமைத்துக் கொடு " என்றார். 

பணியாளரும் உடனே சந்தைக்கு ஓடினார். மறுநாள் மதியம் முதலாளி ஆர்வத்துடன் உணவு மேஜைக்கு வந்தார். 


பணியாளரும் அடக்கமாய் உணவை எடுத்துப் பறிமாறினார். முதலாளி கேட்டார், " இன்று என்னப்பா இறைச்சி? இதுதான் உலகிலேயே கடினமான இறைச்சியா? " என்றார். பணியாளர் சொன்னார்,

" இன்றும் நாக்குதான் சமைத்திருக்கிறேன். ஏனென்றால் உலகிலேயே மிகவும் கடினமான இறைச்சியும் இதுதான் ".
முதலாளி கொஞ்சம் குழம்பித்தான் போனார். 

"என்னய்யா நீ ? நேத்துதான் சொன்னே , நாக்குதான் உலகத்திலயே மென்மையான பொருள்னு
ஆனா இன்னிக்கு நாக்குதான் உலகத்திலயே கடினமான பொருள்னு சொல்றே. ஏய்யா இந்த மாதிரி குழப்புறே?" என்றார். 


பணியாளர் சொன்னார் , " ஐயா! நாக்கு மென்மையானதுதான். இது நல்ல விஷயங்களைப் பேசி எத்தனையோ ஆத்துமாக்களுக்கு ஆறுதல் அளிக்கிறது. நொறுங்கிப் போன எத்தனையோ உள்ளங்கள் இந்த நாக்கினால் புத்துயிர் பெற்றிருக்கின்றன. இந்த நாக்கு மென்மையாகப் பேசுவதால் தோல்வியில் வாழ்ந்த எத்தனையோ பேர் வெற்றியாளர்களாகி இருக்கின்றனர்" . 

முதலாளி சொன்னார், 
" அதெல்லாம் சரிதான். அது கடினமானது என்றாயே! "
பணியாளர் ,

"அதையும் சொல்கிறேன் ஐயா! அது ஒரு கொடிய மிருகமென்பதால்தான் கடவுள் அதைப் பற்கள் என்ற கற்கோட்டைக்குப் பின்னே சிறை வைத்திருக்கிறார். இந்த நாக்கினால் நொறுக்கப்பட்ட ராஜ்யங்கள் எத்தனை! எத்தனை கோட்டைகளை இந்த நாக்கு தரை மட்டமாகியிருக்கிறது !

இல்லாததும், பொல்லாததும் பேசி எத்தனையோ வாழ்க்கையை அழித்திருக்கிறது! இப்போது சொல்லுங்கள். இதை விடக் கடினமான பொருள் உலகில் உண்டா? " என்றார். முதலாளி சந்தோஷமாய் அவரது முதுகில் தட்டிக் கொடுத்து, " உன்னால் பெருமை அடைகிறேன் " என்றார். செல்லமே! உன்னுடைய நாக்கு மென்மையானதா, கடினமானதா?